काठमाडौँ । हत्या गर्ने उदेश्यले नवयुवा आन्दोलनका नाममा घातक प्रहारबाट स्वास्थ्यमा गम्भीर समस्यामा रही हाल उपचाररत नेपाली कांग्रेसका निवर्तमान सभापति शेरबहादुर देउवाले फागुन २१ गते हुने प्रतिनिधि सभा निर्वाचनमा कांग्रेसको पक्षमा लागेर सबै उम्मेदवारलाई जिताउन निर्देशन दिएका छन् ।
देउवालाई भेट्न जाने उनी निकटका अधिकांश नेता कार्यकर्तालाई देउवाले निर्वाचनमा रूख चिन्हमा मतदान गर्ने वातावरण बनाएर कांग्रेसको पक्षमा परिणाम ल्याउन स्पष्ट निर्देशन दिएका हुन् ।
पौडेलले निवर्तमान सभापति देउवाले पार्टीका पक्षमा लागेर कांग्रेसका उम्मेदवारलाई जिताउन सबैलाई निर्देशन दिएको बताएका हुन् । ‘शेरबहादुर दाइकोमा हरेक दिन नै एक/डेढ सय नेता–कार्यकर्ता आउनुहुन्थ्यो’, नेता पौडेलले भने, ‘उनीहरूलाई तपाईंहरू गाउँ जानुस्, कांग्रेसलाई जिताउन लाग्नुस् भनेर निर्देशन दिइरहनुभएको छ । प्रत्यक्ष भेटमा उहाँले दायाँ–बायाँ नलागी कांग्रेसको पक्षमा परिणाम सुनिश्चित गर्न भन्दै आउनुभएको छ ।’
देउवाले कांग्रेसबाट सुदूरपश्चिम प्रदेशका मुख्यमन्त्री बनेका कमलबहादुर शाहलाई समेत स्पष्ट निर्देशन दिँदै आफ्नो प्रदेशसहित देशभर कांग्रेसलाई जिताउन सक्रिय भूमिका खेल्न भनेकोसमेत नेता पौडेलले जानकारी दिए ।
दुई कार्यकाल कांग्रेसको सभापति रहिसकेका देउवाले औपचारिक रूपमा लिखित वा मौखिक अपील जारी गर्ने–नगर्ने विषय टुङ्गो नलागे पनि आन्तरिक रूपमा सबै तहका नेता–कार्यकर्तालाई एकताबद्ध हुन आह्वान गरिसकेको पौडेलले बताए ।
उपचारका लागि सिंगापुर जानुअघिसम्म उनले हजारौँ नेता–कार्यकर्तालाई कांग्रेसका उम्मेदवार जिताउन केन्द्रित भएर लाग्न निर्देशन दिएका हुन् । जेन-जी आन्दोलनपछि सार्वजनिक रूपमा राजनीतिक कार्यक्रममा सहभागी नभए पनि देउवा निवासमा दैनिक सय भन्दा बढी कार्यकर्ता भेटघाटमा जाने गरेको देउवा निकटका नेताहरूले दाबी गरेका छन् ।
भदौ २४ गते जेन-जी आन्दोलनका क्रममा आफ्नै निवासमा आक्रमण भएपछि नियमित स्वास्थ्य उपचारका लागि उनी सिंगापुर जाने आउने गरिरहेका छन् । पछिल्लो दुई दिनअघि देउवा चिकित्सकको सल्लाह बमोजिम धर्मपत्नी आरजू राणासँगै सिंगापुर गएका छन् ।
निवासमा उनले आफू निकटका नेता कार्यकर्तासँग नियमित भेटघाट गर्ने र निर्वाचनमा कांग्रेसका पक्षमा माहोल तयार गर्न निर्देशन दिने गरेको देउवा निकटका नेताहरूको दाबी छ ।
फागुन २१ नजिकिँदै गर्दा देउवा सिंगापुर प्रस्थान गरेपछि विशेष महाधिवेशनको तुष बाँकी राखेको हो कि भन्ने अनुमान भइरहँदा देउवाको यस्तो सन्देश आएको हो ।
उनले व्यक्तिगत उपचारका कारण बाहिर जानु परेको भए पनि पार्टीको चुनावी अभियानलाई तीव्र बनाउन निरन्तर जोड दिएको नेता पौडेलले दाबी गरे । देउवा केही दिनमै फर्कने तालिका बनाएर उपचारका लागि सिंगापुर गएको बताइएको छ ।
देउवाको रक्तचाप बढेकाले स्वास्थ्य जाँच र उपचार अपरिहार्य बनेको पौडेलले दाबी गरेका छन् ।
देउवाले पार्टीभित्र फैलाइएका भ्रम, आशङ्का र टिप्पणीलाई अस्वीकार गर्दै आफू कांग्रेस जिताउने अभियानबाट अविचलित रहेको सन्देश दिएको कांग्रेस पार्टी कार्यालयका निवर्तमान मुख्यसचिव एवं राष्ट्रिय सभाका सदस्य कृष्णप्रसाद पौडेलले बताए ।
