काठमाण्डु, १० फागुन ।
नेकपा माअोवादी केन्द्रकी सांसद बिना मगर मन्त्री बन्ने भएकी छन् । माओवादी केन्द्रका अध्यक्ष पुष्पकमल दाहाल प्रचण्डको बुहारी समेत रहेकी बिनालाई मन्त्री बनाउन ससुरा प्रचण्ड पनि लागेका छन् । पति प्रकाश दाहालको मृत्यु भएको केहि महिना मात्रै भएकाले पनि सहानुभुति दिना पनि मन्त्री पद दिनुपर्ने भन्दै बिनाका पक्षमा माओवादीका केहि नेताहरु देखिएका छन् । यो संगै प्रदेश नम्बर ७ बाट नेकपा माओवादी केन्द्रकी एक्ली महिला सांसद मगर मन्त्री बन्ने भएकी हुन् । नेकपा माओवादी केन्द्रका सात नम्बर प्रदेश ईन्चार्ज लेखराज भट्टले बिहीबार खुमलटार पुगेर पार्टी अध्यक्ष पुष्पकमल दाहाल प्रचण्डसमक्ष बीनाको नाम केपी ओली नेतृत्वको सरकारमा मन्त्रीका लागि सिफारिस गरेका हुन् ।
कञ्चनपुर निर्वाचन क्षेत्र नं १ बाट वाम विजयी भएकी मगर प्रदेश नं ७ बाट प्रतिनिधि सभामा प्रतिनिधित्व गर्ने एक्ली महिला पनि हुन् । माओवादीको भागमा परेका सात मन्त्रालयमध्ये प्रदेश ७ बाट भट्ट नै मन्त्री बन्ने चर्चा चलिरहेको थियो । तर उनले बीनाको नाम प्रदेश ७ बाट मन्त्रीका लागि पार्टी अध्यक्षकहाँ सिफारिस गरेका हुन् ।
कैलाली निर्वाचन क्षेत्र नं ५ बाट उठेकी आरजु राणा देउवा र कैलालीकै निर्वाचन क्षेत्र नं १ बाट प्रतिस्पर्धामा रहेकी वाम गठबन्धनकी उम्मेदवार गरिमा शाह पराजित भएपछि बीनामात्रै प्रदेश ७ बाट प्रतिनिधि सभामा विजयी भएकी एक मात्र महिला सांसद हुन् ।
मगरले दशवर्षे जनयुद्धका क्रममा २७ महिने हिरासत जीवन बिताएकी थिइन् ।
