पोखरा, असार ३१
अन्नपूर्ण सेन्चुरी पर्यटन समितिद्वारा स्थापित ‘अन्नपूर्ण पर्यटन पत्रकारिता पुरस्कार–२०८३’ पत्रकार भुपाल गुरुङलाई अर्पण गरिएको छ।
गत जेठ २० गते कास्कीको घान्द्रुकमा आयोजित छैटौँ अन्नपूर्ण म्याराथन तथा अन्नपूर्ण आरोहण दिवसको समापनमा गुरुङलाई सम्मान गर्ने कार्यक्रम थियो। तर, अकस्मात एपेन्डिक्सको समस्याका कारण उनी अस्पताल भर्ना हुनुपरेपछि स्थगित भएको उक्त पुरस्कार बुधबार पोखरामा आयोजित एक विशेष कार्यक्रमका बीच अर्पण गरिएको हो।
पुरस्कारको राशि रु. २५ हजार नगद र सम्मानपत्र रहेको छ।
मुख्य विशेषताहरू र पुरस्कार वितरण
पुरस्कारको गरिमा: अन्नपूर्ण क्षेत्रको पर्यटन प्रवर्द्धनमा उल्लेखनीय योगदान पुर्याउने एक जना पत्रकारलाई हरेक वर्ष जुन ३ (अन्नपूर्ण आरोहण दिवस) का अवसरमा यो पुरस्कार प्रदान गरिँदै आएको छ।
पुरस्कार समर्पण: प्रतिभा छनोट समितिको सिफारिसमा समितिका अध्यक्ष ललित गुरुङ, महासचिव दिलिप गुरुङ, सचिव मिकास गुरुङ, छनोट समितिका संयोजक राजबहादुर गुरुङ, सदस्य हरि प्रसाद भट्टराई, टंक अधिकारी, पोखरा उपत्यका नगर बिकास समितीका पुर्ब बोर्ड सदस्य गोपाल गुरुड लगायतका व्यक्तित्वहरूले गुरुङलाई संयुक्त रूपमा पुरस्कार अर्पण गरेका थिए।
पूर्व सम्मानित व्यक्तित्वहरू: यसअघि यो पुरस्कारबाट पत्रकारहरू सन्तोष पोखरेल, रुपनारायण ढकाल, रविचन्द्र पराजुली र रोहितराज पराजुली, बासुदेव पौडेल, दीपक परियार, सम्मानित भइसकेका छन्।
को हुन् पुरस्कृत पत्रकार भुपाल गुरुङ?
जन्म र बसोबास: स्याङ्जाको वालिङ नगरपालिका–३ राम्चेमा जन्मिएका गुरुङ हाल पोखरा–१० अमरसिंहचोकमा बस्दै आएका छन्।
शैक्षिक र व्यावसायिक पृष्ठभूमि: पत्रकारिता विषयमा स्नातकोत्तर अध्ययनरत उनी वि.सं. २०६४ देखि पत्रकारितामा सक्रिय छन्। उनले गोर्खाली रेडियो, युनाइटेड राष्ट्रिय दैनिक र सगरमाथा टेलिभिजन (गण्डकी प्रदेश प्रमुखका रूपमा ९ वर्ष) मा काम गरिसकेका छन्। हाल उनी विगत ८ वर्षदेखि कान्तिपुर टेलिभिजनमा कार्यरत छन्।
सांगठनिक आबद्धता: उनी नेपाल पत्रकार महासंघ कास्कीका जिल्ला सचिव हुन्। साथै फोनिज, संसदीय पत्रकार मञ्च, प्रेस युनियन र चलचित्र पत्रकार संघलगायतका संस्थाहरूमा पनि सक्रिय छन्।
अन्य सम्मान: यसअघि उनले क्याप्टेन रुद्रमान स्मृति ग्रामीण पर्यटन पत्रकारिता पुरस्कार–२०७६, टंकदेवी–तुलसीप्रसाद पत्रकारिता पुरस्कार–२०७८, नेपाल हवाई खेलकुद संस्था पत्रकारिता पुरस्कार–२०७९ र पूर्वप्रधानसेनापति छत्रमानसिंह गुरुङ–कमला गुरुङ पत्रकारिता पुरस्कार–२०७९ प्राप्त गरिसकेका छन्।
